احمد حافظ يكتب …للناس إللي عايزة تعرف وزير التعليم الجديد عن قرب و عايزة تفهم الراجل ده ناوي يعمل إيه بالظبط
بقلم : احمد حافظ
………
– الراجل اتكلم عن مجانية التعليم قال “على الورق التعليم مجاني لكن في الحقيقة مش مجاني بدليل إن فيه 30 مليار بيدفعها الأهالي على الدروس الخصوصية، هو بقى عايز ياخد جزء من الفلوس دي بفرض ضرائب على مراكز الدروس الخصوصية ومن خلالها هيطور التعليم ويبني مدارس من غير ما يحتاج للدولة تزود له فلوس للتطوير.
– الراجل مش ضد الدروس الخصوصية لكن تكون بشروط ومعايير.. مين يدي دروس وإيه مواصفاته وهل مؤهل للمهنة ولا لا، وهل المكان اللى هيدي فيه درس مناسب وآدمي ولا لا.. وهل من حق أي حد يفتح مركز خصوصي ولا لا.. من حقه يدي درس لكن مش من حقه فرض ده على الطالب ولا إنه يبقى ماسكه من إيده اللى بتوجعه.
– الراجل لما اتكلم عن المعلم قال إنه المفروض يكون راتبه أعلى راتب في الدولة وإنه يبقى رقم واحد في المكانة الاجتماعية والثقافية والاقتصادية.. يعني هيبته ترجع.
– لما اتكلم عن الامتحانات قال للأسف بتعتمد على الإجابات النموذجية مش الفكر والابتكار النموذجي علشان كده بقى فيه بعبع في كل بيت مصري.. أنا هقضي على البعبع وألغى فكرة الإجابة النموذجية دي علشان الطالب يبتكر ويبدع في إجابته.
– لما اتكلم عن المدرسة قال للأسف بقت سجن كبير بالنسبة للطلبة، يبقوا رايحين متنكدين وهما مروحين منها مبسوطين، ولازم المناهج تخفف حتى لو هلغي ربع أو نص المقرر وأقلل المواد وأزود الأنشطة والألعاب.. لأن التعليم مش بكترة المواد اللى ممكن تخلي الطالب يكره نفسه.. التعليم يعني تحب المدرسة وتبقى فرحان وانت رايح.
– لما اتكلم عن التعليم قال للأسف بقى مجرد امتحان ثم شهادة ثم زواج ثم قاعدة في البيت.. يبقى هنا التعليم ملوش لازمة.. لازم لما الطالب يتعلم يبقى بيتعلم علشان هدف مش مجرد حامل للشهادة اللى بيروح يخطب ويتجوز بيها وهو مش متعلم حاجة لحياته.
– لما اتكلم عن الأطفال الصغيرين واللى لسه هيدخلوا المدرسة قالك لازم أنزل لمستوى فكرهم سواء بالمنهج أو بشخصية المعلم نفسه.. يعني لازم المنهج يناسب سنهم والمدرس يكون متدرب على معاملة السن ده مش يكون واحد معندوش ثقافة التعامل مع الطفل، وهيكون فيه تعامل مختلف مع القضية دي.. وهو نفسه قال لما لقيت معظم الأطفال بيلعبوا بلاي ستيشن اتعلمت البلاي ستيشن علشان أكون قريب من دماغهم وسنهم.
– لما اتكلم عن الخبرات اللى ممكن يستعين بيها رد وقال إن أي شخصية عندها رؤية جادة وواقعية للتطوير هيكون ليها دون في الوزارة.. ودور يعني هيتم تكليفها بملف معين.. وملف معين يعني طل فريق هيكون مسئول عن ملف يتحرك فيه وينجزه في وقت معين مش أنا لوحدي اللى هعمل كل حاجة.. لازم يكون فيه مجموعة فرق مسئولة عن ملفات.
– الراجل لما اتكلم عن الإعلام قال إن دوره لا يقل عن دور أي مسئول في الوزارة، ومن خلاله هيكون فيه قياس لمدى رضا أو غضب الناس في الشارع.. هو من يقيم أداء الوزارة وهو من يخاطب الناس بالحقيقة ويوصل أرائهم.. والوزارة والإعلام في مركب واحد.. ومش هقول حاجة للإعلام محصلتش.. والحاجة اللى مش عارفها هقول معرفهاش.. مش هخبي حاجة ولا هضحك على حد.. واللى هيحصل هنقوله وبس.
– بكل صراحة.. لما اتكلم عن نظام امتحانات الثانوية العامة الجديد اللى اسمه “البوكليت” قال إنه بيقتل الفكر والإبداع آه.. والدولة مش عاجبها ده آه.. بس ده حل مؤقت لأزمة تسريب الامتحانات، وده مش هيستمر ولازم نشوف حل تاني بس ده حل مؤقت.
– لما اتكلم عن طريقة التدريس نفسها قال لازم تتغير في القريب العاجل.. لازم تكون طريقة الشرح جديدة ومقنعة..مش هستنى لما الطالب ينام في الفصل من المدرس.. ولا لما الطالب يعتدي على مدرس ولا معلم يعتدي على طالب.. المدرسة لازم ترجع هيبتها وتكون هي أهم مبني في أي مدينة أو حي.. وطريقة الشرح الحالية مجرد حفظ وتلقين واستماع.. ده هيتغير.. الدول اللى بره مش أحسن مننا.
– لما اتكلم عن غضب أولياء الأمور والطلاب والمعلمين من القرارات اللى بتطلع من الوزارة فجأة، قال إن ده مش هيتكرر ودي تعليمات الرئيس.. وهيكون هناك استطلاع رأي لكل الآراء قبل أي قرار.. الوزارة لوحدها مش صاحبة القرار قد الناس نفسها ما هي اللى صاحبة الحق في رفض أو قبول القرار، وهيكون فيه موقع خاص لإبداء الرأي وتلقي الشكاوي والرد عليها خلال فترة زمنية محددة بفريق مختص لذلك.
– لما اتكلم عن المدارس الخاصة قال إن من حق ولي الأمر يقدم لابنه في مدرسة مصروفاتها 20 ألف ومدرسة تانية مصروفاتها 2000 جنيه.. بس الأول هسأل صاحب المدرسة: ايه الخدمة التعليمية اللى تمنها 20 ألف؟ بتعمل إيه جديد في التعليم يساوي المبلغ ده؟.. هل التعليم عندك يساوي 20 ألف؟ إن لقيته يساوي أهلا وسهلا مش يساوي يبقى ده ابتزاز.. والوزارة مش هتقف تتفرج على ابتزاز أي مدرسة خاصة.
……
أنا ….
أنا كنت حاضر في اجتماع الوزير مع الصحفيين ونقلت الكلام حرفيا علشان تعرف هو إيه وبيفكر إزاي وإيه خطته.. لأنك انت اللى هتحدد هل ده أمين على مستقبل ابنك ولا لأ.
..
أعتذر جدا للإطالة
