متابعه.. ايمن المرسى
الموضوع ببساطة انني وقفت بجانب الطريق في ثلاثة أماكن .الاول والثاني : شارع جيهان والثالث : راندبلو ولما رجعت لاقيت فيه استيكر علي زجاج السيارة ، المهم اخذت الاستيكر وبحثت حتي وصلت للظابط في الثلاث مرات وفيهم مره قعدت ادور عليه لمدة ساعة في شوارع المنصورة وفي النهاية لاقيته عند جزيرة الورد .. الظابط : عاوز ايه . أنا : عاوز ادفع تصالح فوري علشان الاستيكر دا لاقيته علي الازاز . الظابط : هات الرخصة .. انا : اتفضل . الظابط : هات 40 جنيه . انا : 40 جنيه ؟! الظابط : اه 40 جنيه بس ول عاوز تدفع اكتر ؟! انا : اتفضل ، طيب والاستيكر دا والمخالفة كدا خلاص . أمين الشرطة : خلاص يا استاذ كدا خلاص قولتلك اتشالت اهو ماتقلقش .. اخدت الايصال ومشيت ، ولكنني في الثلاث مرات لم ارمي الايصالات واحتفظت بهم وبتواريخهم .. النهاردة روحت نيابة المرور اطلع براءة ذمة وهنا كانت الكارثة الحقيقية … 600 جنيها بواقع 200 جنيها لكل مخالفة مرورية والمفاجأة الكبيرة ان المخالفات الثلاثة للثلاثة ايصالات الي معايا وبالتواريخ … وقفت لا يخرج مني غير كلمة حسبي الله ونعم الوكيل في المرور ومل واحد فيهم ضحك عليا وظلمني .. دخلت ادور علي اي حد في النيابة قالولي ادخل للاستاذ / محمد فدخلت له وشرحتله الموقف وكانت الصدمة الكبري .. قال لي الايصال دا تصالح مع الونش فقولت له انا رايح واخد الاستيكر للظابط وبقوله عاوز اتصالح علشان دا فقطع ليا وصل ب 40 جنيها وقالي خلاص … ضحك وقالي بيزحلقك قولتله يعني ايه فقال لي بالنص احيانا مابيكونش معاهم دفاتر التصالح فبيخلصو دفاتر الونش فقلت له بس دا ظلم وافتراء لانني ” وافقت بكامل ارادتي علي التصالح الفوري ” وبذلك الظباط الثلاثة لم يكن عندهم ضمير لانه رغم موافقتي للتصالح اعطاني ايصال ب 40 جنيها لادخل له باساس المخالفة بتاعتي ولو انهم طلبو مني ازيد لدفعت لهم وبدلا من دفعي الان 600 جنيها كنت دفعت 300 وايصالات ال 40 جنيها مكانش لها لازمة . قالي كل الي تقدر تعمله تظلم ….. وانا اقولها الظلم ظلمات يوم القيامة … اخطات ووافقت علي دفع المخالفة وبحثت عنهم بشوارع المنصورة وبدلا من الغاء المخالفة تركوها كماهي واخذ مني مبالغ اخري لادخل لها بالمخالفة .. اتوجه للسيد رئيس مرور الدقهلية الحصي ولا اعلم ان كان سيري هذا المنشور ام لا … وطلبي الوحيد له أجمع رجالك بادارة المرور وقل لهم ان يتقوا الله فينا … ولما يكون فيه مواطن اتلزق له استيكر ورايح يتصالح يطلعله دفتر ويدفعه 100 جنيها فوري . وبلاش موضوع 40 جنيها تصالح مع الونش لانني ببساطة بعد كدا امشي وماكونش مواطن محترم واروح طواعية ابحث عنكم علشان اسدد المخالفة … ياسيادة مدير ادارة المرور انا الملتزم دفعت اكتر من المخالف الي خد عربيته وماعبرش حد .. انا روحت دفعت 40 جنيها والمخالفة نزلت 200 جنيها اجمالي الي هادفعه 240 × 3 مخالفات =720 جنيها في الوقت الي فيه شخص اخر خد العربية ومشي ومارحش للظابط يدفع المخالفة . وقفنا نحن الاثنين اليوم بنيابة المرور انا اجمالي الي هدفعه للمخالفة الواحدة 40 جنيها ايصال + 200 غرامة = 240 اما هووو الي مارحش يتصالح ومشي فدفع 200 جنيها فقط … بتعلمونا لانحترم قواعد المرور بتعاملكم هذا ارحمونا يرحمكم الله وبلاش ظلم فينا . وانا مش هتنازل عن حقي كمواطن ولو ما اخدتش حقي هابعت الشكوي لوزير الداخلية لا انا كدا اتضحك عليا .
