بالصور .. شاب من المنصورة يتحدى إعاقته بعربة حمص شام تلفت الأنظار .. ويتمنى مقابلة محافظ الدقهلية لحل مشكلته

كتبت : شيماء العدل

تحدى الشاب أحمد رمضان 32 سنة من عزبة الصفيح التابعة لمدينة المنصورة ، إعاقته الناتجة عن دهس قدمه أسفل قطار منذ صغره  ؛ مما أدى لبتر أصابعه الأربعة وقيامه بعمل أكثر من عملية ووصل الأمر لضرورة بتر قدمه بالكامل بعربة حمص تخطف الأنظار .

في كل صباحٍ يجر أحمد عربته الخاصة التى صنعها بشكل ملفت للنظر ، ليبيع حمص الشام وبليلة بحثا عن مصدر دخل لأبنائه الأربعة .

قال أحمد “أنا صنعت من التروسيكل عربة لبيع حمص الشام والبليلة بشكل جذاب ، مستخدما وسيلة جديدة لجذب الناس وكل ماأتمناه أن أحصل على ترخيص “.

وواصل “أنا اللى فكرت فى هذه الفكرة، حيث يقف الكثير من الناس أمامها يتفرجوا عليها لغرابة شكلها، وجذبت الكثير من الناس ، مشيرا إلى أنه قام بصنعها بتكلفة حوالى 35 ألف جنيه بمساعدة أصحابه وأهله .

وأضاف أن زبائنه من كل المستويات، يشهدون له بالنظافة ، وأنه يقوم بالتجول بالعربة فى كل مناطق المنصورة ولا يعمل أى شئ مخالف وكل مايتمناه أن يعيش هو وأبنائه ” .

ومن جانبه قال أحمد ” أنا تعبان ونفسي أعيش مش عايز حاجه غير حقي أنا عندي إعاقة صعبه ، وعندي أولاد عاوزين أكل وشرب ومافيش دخل غير معاش التضامن اللى مش بيكفى ونفسى أعيش بالحلال من غير ماأحتاج لحد ، وأنا عامل حاجة نظيفة ومشرفة وماشي قانوني ومعايا شهاد صحية ” .

وواصل أحمد “مش عايز غير ترخيص أتجول بالعربية مش أكتر أنا مش عايز وظيفة ولا حاجة زي الناس وده من حقي انا معايا شهادة إعاقة ، وكل اللى عايزة ترخيص للعربية علشان أعرف أشتغل ” .

وفى نهاية حديثه قال أحمد ” أنا نفسى أقابل المحافظ واحكيله على ظروف مرضى ، أنا عايز أعيش زى باقى الناس بس ، أنا مخرجتش النهارده علشان نفسيتى تعبت من إهانة أمناء الشرطة ليا كل شوية واحد ييجى يقولى أنا هاخد العربية ، رغم أن أنا مش بقف فى نص الطريق وأنا مرخص التروسيكل بس مش معايا أدفع كل شوية 100 جنيه علشان أمين الشرطة يسيبنى أبيع ” .