كتب : ياسر عبد الرازق
تجولت عدسة المنصورة توداي بشارع الجلاء لترصد استعدادات المواطنين لشهر رمضان الكريم.
قالت أم محمد “أسعار السنة دي أغلي من كل سنة بس لازم نشتري علشان نفرح الولاد بالياميش ، ونفطر علي التمر ذي سنه النبي وكفاية نجيب تمر وزبيب وجوز هند علشان القطايف والكنافة ” .
وأضاف ياسر المغاوري موظف بالسنترال “الحاج غالية جدا وانا موظف وعندي ولاد بالمدارس وخلصت من الدروس لقيتني مطالب بحاجة رمضان ، وهجيبها لما أقبض بس علي أد دخلي “.
فيما رأى خاطر من شارع البستان سواق تاكسي “الأهم من الياميش روحوا ابحثوا عن الفساد اللي في المحليات والابراج اللي بتتبني مخالفة ، وأقبضوا علي الحرامية اللي سرقين قوتنا وقوت ولادنا لكن الياميش مش حاجه حيوية ومش لازم يجي طالما غالي “.
وقالت ميريان مدرسة ابتدائي ” أحرص علي شراء حاجات رمضان ومشاركة جيراني المسلمين فرحة رمضان وبحب اجيب الياميش لانه بيبقي طازة في رمضان بعكس بقية العام بيبقي متخزن “.
وأضاف مصطفي العامري عامل بمغسلة ” هشتري الضروري بس يعني البلح والزبيب وجوز الهند، واركز علي العصاير علشان رمضان جاي في الحر السنه دي “.
أما محمد سلطان صاحب مقلة بالجلاء ” السوق السنة دي مضروب والإقبال علي الشراء ضعيف جدا ، وربنا يسهل ويزيد الفترة الجاية لان جايب بضاعة غالية عن كل سنه وعايز ابيع واوزع، اسعار كل حاجه زادت الضعف تقريبا عن السنة الماضية مثل قمر الدين ارتفع من١٨الي٤٠الزبيب ارتفع من٤٠-٦٠ وجوز الهند ارتفع من٥٠-٦٤ عين الجمل زاد من٧٠-٩٦ الفسدق ارتفع من ١٦٠-٢٤٠.اما اسعار البلح فحسب نوعه السكوته ٤٠جنيه العينات٣٦جنيه ،جنديلة٣٥جنيه ، واضاف أن أسعار المنصورة أقل من أي محافظة أخرى .
التعليقات متوقفه