كلمة بتسمعها كتير لما يكون ليك حق
معلش ده أكبر منك !!
معلش أصله أصغر منك !!
معلش أصلها بنت !!
معلش أصل اعصابه تعبانة
لحد مايوصل بيك الحال إنك تسأل نفسك سؤالين :-
1- أمتي لما تيجي تاخد حقك ميتقلكش الكلمة دي ، أمتي ميتقلكش معلش ؟؟
2- وليه لما بتكون أنت الغلطان مبيقبلوش معلش بتاعتك !!
حاجات كتير بنتحايل بيها عشان نضيع حقوق الناس زي كلمة معلش اللي أصلا اللي بيقلها مبيعملش بيها وبيبقي كل هدفه انه يضيع حق الناس بطريقة شيك وبإقناع صاحب الحق انه يتنازل عن حقه
وفي النهاية بتخلي مفيش جزاء واللي غلط هيغلط تاني وتالت ومش هيكون قلقان طالما معلش موجودة !!
كلمة أضرارها كتير مش بس علي اللي اتنازل عن حقه بل لكل اللي بيكون ليه حق لأن الكلمة هتخلي فيه عرف بكده وتضيع حق كل واحد حتي لو في امس الحاجة إليه طالما معلش موجودة
فبطلوا الكلمة دي وخدوا حقكم ، او اللي عايز يتنازل يتنازل طواعية واختيارا من غير معلش ،، تنازل فيه معني التبرع والتسامح لا الالزام او العرف
