كتبت : منة القرمانى
واصل سعر الأسماك فى الإرتفاع خاصة مع إقتراب أعياد الربيع “عيد شم النسيم ” ففى سوق الدراسات بالمنصورة ومع زيادة الطلب عليه حيث يستخدم البورى لصنع الفسيخ ، فقررنا النزول إلى السوق والإستفسار من المستهلكين ومعرفة رأيهم فى إرتفاع أسعار السمك .
قالت وفاء عوض (ربة منزل ): ” أن سعر السمك زاد منذ حوالى أسبوع وبالرغم من ذلك بشتريه لما ولادى بتطلب مبعرفش أقولهم لا أما بالنسبة للفسيخ بحب أشترى البورى وأعمله فى البيت لأنه أنضف وأحسن”.
أشارت حنان محمود (مدرسة رياضيات ) أن السمك إرتفع سعره من حوالى شهر وبدل ماكنا بناكل ٣ مرات فى الأسبوع سمك بقيت بكتفى بمرة واحدة أما بالنسبة للفسيخ مش بناكله ولكن بناكل رنجة فى شم النسيم .
أوضح محمود سلامة ( بائع سمك ) أن السبب الرئيسى فى إرتفاع أسعار السمك هو أن السمك قل كتير فى بحيرة المنزلة وعشان داخلين على عيد شم النسيم وموسم رمضان فالإقبال عالبورى زاد عشان الفسيخ وبعد إرتفاع سعر السمك الناس اللى كانت بتاخد ٣ كيلو سمك بقت بتاخد ٢ كيلو بس ، والضغط عالبورى الأيام دى كتير لأن الناس بتاخده تخلله.
قال عاطف عوض ( سن المعاش ): ” فى زيادة كبيرة فى سعر السمك كنت بجيب البلطى الكبير ب٢٥ جنيه دلوقتى وصل ٣٥ والبورى وصل ل ٦٠ جنيه الكيلو وبالنسبة للفسيخ محدش عندنا بياكله”.
وأضافت هدى عبدالعظيم (موظفة) أن هذه الأيام زاد سعر السمك أقل حاجا ٥ جنيه للكيلو وده بيفرق لو بشترى كمية وكنت متوقعة الزيادة للبورى فقط لكن البلطى زاد هو كمان أما بالنسبة للفسيخ أشتريت بورى قبل مايزيد سعره وخزنته فى الفريزر عشان أقدر أخلله وأعمله فسيخ “.
أوضح عماد أحمد (موظف ) أنه يوجد زيادة مش طبيعية بقالها شهر فى سعر السمك الكيلو اللى كان ب١٥ جنيه بقى ب٢٥ جنيه وبدل ماكنا بنشترى سمك ٣ مرات فى الأسبوع بقينا بنجيبه مرة واحدة بس وبالنسبة للفسيخ مش بحب نجيبه من بره الفسيخ البيتى أضمن وأفضل .
المنصورة اليوم| إرتفاع اسعار الأسماك بالتزامن مع عيد شم النسيم بالمنصورة
